Kantaraborgarsögur

Rhodos

2008-07-17T09:15:00.005Z

Eins og áður hefur komið fram hér á blogginu erum við gömlu hjónin að spóka okkur í sólinni á Grikklandi. Við sendum börnin heim til Íslands áður en við fórum svo við þyrftum ekki að hafa þau hérna með okkur sem hefði að sjálfsögðu verið mun dýrara. Í staðinn getum við leyft okkur meira hérna, farið dýrara út að borða og keypt okkur dýrari afþreyingu. Þau borða hins vegar bara súrsuð svið og rauðmaga hjá afa og ömmu á Suðureyri. Nei, þetta er nú smá grín. Við söknum þess heilmikið að hafa þau ekki hjá okkur hérna. Það var sama hvað við reyndum, þau vildu miklu frekar fara heim á Suðureyri á Sæluhelgi. Nú setjum við nokkrar myndir af okkur hér inn á síðuna til að allir geti nú séð hvað við höfum það annars gott hér í sólinni. Við förum síðan til baka til Englands á Laugardagskvöld og verðum síðan í Canterbury í tvo daga og leggjum af stað keyrandi til Skotlands á mánudag. Við tökum svo ferjuna í Skotlandi aðfaranótt miðvikudags. Þannig að það styttist í að við verðum komin á kaldan klaka. Bestu kveðjur.

Síðustu dagarnir í Kantaraborg

2008-07-04T16:24:00.004Z

Vá. Það er búinn að vera geðveikur hasar hjá okkur og því lítill tími fyrir report. Það er hægt að mæla að það sé komið of langt frá síðasta fréttatíma þegar Didda fer að kvarta.
Amma og afi á Suðureyri eru búin að vera í heimsókn, voru frá 19. til 30. júní. Með þeim komu Benóní og Pétur Óli. Björn Ægir kom svo nokkrum dögum seinna. Þegar þau fóru heim kom Fríða Bára og með henni Ágúst Orri og Ástrós Þóra. Þau verða hérna til 9. júlí og þá fara krakkarnir með þeim heim og Bryndís líka. Það verður því fjör hjá Fríðu í flugvélinni.
Venni fór líka heim á klakann sama dag og amma og afi til að fara í smá starfskynningu á Ísafirði. Hann er kominn með nýtt djobb fyrir vestan, verður stöðvarstjóri í Funa. Hann er alveg í rusli yfir því hehe, nei djók. Hann kom heim núna áðan og rétt náði að sækja Kötlu í skólann síðasta skóladaginn hennar.
Mamma var búin að kaupa ís fyrir krakkana og við áttum smá kveðjumóment þarna með krökkunum og kennurunum þar uppfrá.
Nú eru bara allra síðustu dagarnir framundan, þurfum að fara að pakka dótinu og svoleiðis. Meira fljótlega.

Hæ, hó jibbí jei - Það er kominn 17. júní.

2008-06-17T09:01:00.003Z

Litla stelpan okkar hún Katla Vigdís á afmæli í dag og er orðin 6 ára gömul.

Þetta er reyndar frekar skrítinn afmælisdagur fyrir hana þar sem hún mætti í skólann í dag, ekkert víðavangshlaup og enginn hefur enn sem komið flaggað fyrir henni. En við ætlum þó að reyna að hafa þetta skemmtilegan dag fyrir hana og var hún vakin upp snemma í morgun og sungið fyrir hana og henni færðar kökur í rúmið. Bræður hennar voru svo sætir í sér að þeir gáfu henni hlaupahjól en frá pabba og mömmu fékk hún loksins sitt fyrsta tvíhjól. Hún var ekkert smá ánægð með þessar gjafir. Eftir skóla ætlum við að gera eitthvað skemmtilegt saman og fara svo út að borða með skvísunni.

Á laugardaginn hélt hún upp á afmælið sitt og bauð öllum krökkunum í bekknum og síðan auðvitað líka Bryndísi frænku. Það var því mikið fjör hjá okkur þennan dag enda bæði trambólín og hoppukastali útí í “stóra” garðinum. Katla Vigdís fékk fullt af flottum gjöfum og þegar afmælið var búið þá færði hún öllum krökkunum smá gjöf í poka, en það er hefð hér.

Eftir afmælisveisluna skelltum við okkur í tívólí sem var staðsett á túninu við hliðina á leikskólanum sem ég vinn á.
Á sunnudeginum fórum við síðan í hjólaferð og var það einnig mjög skemmtilegt.

Það hefur því verið nóg að gera um helgina enda verið að njóta þessara síðustu vikna í botn.

En endilega óskið Kötlu Vigdísi til hamingju með afmælið hér á síðunni, það myndi gleðja hana.

Skemmtilegir dagar!!

2008-05-25T09:34:00.009Z

Jæja núna er best að ég fari að blogga svolítið. Það virðist enginn lesa bloggið hjá Venna, eða alla vega eru fáir sem taka þátt í spurningarkeppninni hans. En um að gera að reyna.

Við erum búin að fá alveg frábæra daga hérna úti, sól og 25 – 30 siga hita og við höfum notið þessara daga í botn. Reyndar er það nú svo að í leikskólanum hjá mér þarf ég samt sem áður að klæðast þessari forljótu skyrtu og svörtum ömmubuxum. Það er sko ekkert hægt að pæjast í vinnunni. En því miður eru þessir dagar liðnir og tjallarnir tala um að þar með sé sumarið búið og rigningin tekin við, en ég vona nú að það verði nú ekki svo slæmt.

Jóna Magga og Ólína Halla voru í heimsókn hjá okkur um daginn og rétt misstu af þessu frábæra veðri, en fengu samt ágætis vorveður þessa daga sem þær voru hjá okkur. Katla Vigdís var auðvitað alveg í skýjunum yfir því að fá frænku sína og vinkonu í heimsókn. Loksins kom einhver krakki í heimsókn til okkar sem hægt væri að leika við. Þær stöllur skemmtu sér vel saman og auðvitað Bryndís líka, en ég held að henni hafi ekki síður þótt það skemmtilegt að fá einhvern leikfélaga sem talar íslensku. Við vorum dugleg að sýna þeim mæðgum bæinn og í leiðinni var verslað smá. Einnig fórum við að skoða Howlett dýragarðinn, en þar eru m.a. apar, ljón, nashyrningar og fílar, svo eitthvað sé nefnt. Við vorum mjög heppin með veðrið þennan dag, sól og hiti.

Á sunnudeginum keyrðum við um svæðið, m.a fórum á ströndina hjá Folkestone, og skoðunum hvítu klettana hjá Dover og St. Margaret’s bay, en það er mjög fallegur staður við sjóinn. Þennan dag og enduðum við síðan að sýna þeim Sandwich, “fyrirheitna staðinn” eða staðinn sem vildi okkur ekki eins og Hrafnkell segir. Þar fengum við okkur að borða á frábærum Ítölskum veitingastað sem heitir Bella Amalfi, sem heitir eftir bænum á Ítalíu þar sem við keyptum hringana okkar forðum daga. Voða rómó.
Þetta voru skemmtilegir dagar sem liðu fljótt og átti Katla Vigdís svolítið erfitt með að kveðja. En tíminn líður fljótt og brátt verður þetta viðburðarríka ár okkar í Englandi á enda, í raun eru bara nokkrar vikur eftir.

Erum við nú að skipuleggja þessar fáu helgar sem eru eftir, því ekki viljum við koma heim án þess að hafa séð alla þá staði sem við ætluðum okkur að sjá, eigum t.d. enn eftir að sjá vaxmyndasafnið og fara í London Eye. Síðan verður alveg brjálað að gera í heimsóknum í júní, sem er alveg frábært að svona margir ætla að koma og heimsækja okkur, það verður að segjast eins og er að það er nánast orðið fullbókað (spurning að koma fyrir dýnu í baðinu og láta einhvern gista þar, enda erum við með þrjú klósett í húsinu sem er alveg óþarfi).

Gleymdi reyndar að segja frá einni örheimsókn sem við fengum, hver önnur en Áslaug frænka og Arnar, þau skruppu í kaffi til okkar frá London og ég held að ég hafi náð að hitta þau í tvær klst. Já svona á að gera þetta, allt er hægt ef viljinn er fyrir hendi. Það var auðvitað alveg frábært að hitta þau.
Nóg hefur verið að gera um helgina, fullt hús af vinum strákanna og einn fékk að gista. Það er alveg meiriháttar hvað allt gengur vel hjá krökkunum og hvað þeim hefur tekist að eignast vini hér og standa sig vel í skólanum. Ég er svakalega stolt af þeim öllum.
Læt þetta duga í bili og takk fyrir allar kveðjurnar í gestabókinni.
Kv. SRV

Pop Quiz 2

2008-05-18T12:14:00.005Z

Jæja, það virðist enginn ætla að hafa þetta. Þá kemur hér önnur spurning. Við Bjarki fórum í gærkvöldi á aðra tónleika. Þeir voru haldnir hér inni í London, í þúsaldarhvelfingunni eða hvað þeir nú kalla þetta. Þetta er skásta myndin sem ég náði af bandinu sem við fórum að heyra. Og hvert er nú svo bandið?
Þið fáið meira að segja tóndæmi líka.
Þessi er alveg ógeðslega erfið. Ég veit það.

Pop Quiz

2008-05-13T10:54:00.005Z

Hér er búin að vera þvílíka veðurblíðan. Gaman að segja frá því.
En við fórum á tónleika í gær. Gömlu hjónin og Valgeir. Spurt er: Hver er hljómsveitin? (mynd til hliðar, smellið á til að stækka).
Nú kemur í ljós hversu vel þið eruð að ykkur í poppfræðunum. Svar óskast í athugasemdakerfið. Ekki vera feimin.
Þegar svarið er komið kemur alveg massíft öppdeit frá okkur.
Góðar stundir.

Skíðaferðin

2008-04-15T08:30:00.013Z

Þetta var alveg geeeeðveikt gaman þarna í Sviss. Fengum æðislegt veður mest allan tímann og færið var líka gott. Allavega fram að síðustu tveimur dögunum. Húsið sem við vorum í var staðsett alveg við hliðina á braut sem lá niður að stólalyftu sem flutti okkur upp á svæðið, þannig að það var lítil fyrirhöfn að koma sér af stað. Við vorum á svæði sem heitir Thyon og er austasti hluti svæðisins sem þeir kalla Dalina fjóra. Vestasti hlutinn er Verbier og þar á milli Nendaz og einn annar sem ég man ekki hvað heitir. Hægt er að renna sér á milli allra þessara svæða, en það er hins vegar heilmikið ferðalag svo að við létum það nú bara eiga sig. Við vorum hins vegar tvo daga í Nendaz, keyrðum yfir í bæinn og tókum kláf upp á svæðið. Þar fengum við besta veðrið í túrnum. Það sem verra var að það vildi enginn fara "heim" aftur. Allir vildu vera lengur í Sviss, enda landið ótrúlega fallegt, eða fara heim til Íslands. En tíminn okkar hér í Englandi styttist óðum, og í dag er sól og hiti. Katla Vigdís leikur sér úti í garði léttklædd.

Myndirnar tala sínu máli.

Páskarnir

2008-03-31T22:47:00.007Z

Hó hó. Við fengum sendingu úr Hnífsdal um páskana eins og við höfum minnst á. Gömlu hjónin komu með örverpið hann Jósef litla sem er nú bara ekkert lítill lengur. Við fórum til Hastings í sædýrasafn þar sem við sáum hákarla, risakolkrabba og skötur svo eitthvað sé nefnt. Svo fórum við niður í bæ þar sem Katla valdi sér bangsa eða öllu heldur kisu sem amma gaf henni.
Hún nefndi kisuna Birnu eins og kisuna okkar heima sem hún saknar alveg ógurlega mikið. Hún lét setja í hana mjálmara og hjarta þannig að finna má hjartslátt sé kisan kreist. Hún hefur varla sleppt henni úr fanginu síðan hún fékk hana.
Á páskadag fórum við í messu í stóru kirkjunni hérna niðurfrá. Það var heilmikil upplifun fyrir okkur, sérstaklega þann guðlausa.

Á næsta laugardag eldsnemma, keyrum við af stað til Sviss. Við þurfum að ná ferju frá Dover til Frakklands og síðan þurfum við að keyra allan daginn og fram á kvöld. Svo ætlum við að dvelja í fjallakofa í Ölpunum í heila viku og fara á skíði. Júbbí gaman. Ingibjörg og Bjarki og Bryndís ætla að fljúga og verða komin á undan okkur þarna niður eftir. Það er bara fínt því þá geta þau verið búin að kynda upp og hita Swiss miss þegar við mætum.

Heimsóknir frh.

2008-03-16T21:55:00.018Z

Jæja, er þá ekki bara kominn tími á smá blogg.

Það var mjög gott veður hjá okkur í dag, ég held að það hafi verið langt í 20 stiga hiti, þannig að ég held að vorið sé bara komið. Það eru útsprungnar páskaliljur út um allt og allur gróður er að koma til. Við erum öll farin að hlakka til páskanna því að þá eigum við von á afa og ömmu í Hnífsdal ásamt Jósef í heimsókn. Páskafríið er þó ekki langt hjá okkur, bara frí á föstudeginum og anna í páskum, en í staðinn fá krakkarnir "páskafrí" 4 – 21. apríl, og þá förum við líka í skíðaferðina, jibbí.

En annars varðandi heimsóknir, þá er ekki annað hægt að segja en að fólk hafi verið duglegt að heimsækja okkur og í febrúar bættust Lilja og Hilmar við og einnig kom Björn Ægir í heimsókn til okkar.

Því miður var veðrið samt ekkert sérstakt þann tíma sem þau voru hjá okkur, frekar kalt, en það hefði nú getað verið verra.

Lilja og Hilmar stoppuðu í tvo daga hjá okkur, komu í rauninni við hjá okkur úr annarri ferð. Þeim var að sjálfsögðu sýnt fyrirheitna landið Sandwich sem vildi okkur ekki að sögn Hrafnkels, síðan var Canterbury skoðuð og eitthvað smá verslað eins og gengur. Það var auðvitað alveg frábært að fá þau í heimsókn, og Katla naut þess að láta Lilju frænku lesa fyrir sig.

Stuttu síðar komBjörn í heimsókn og var hjá okkur í tæpa viku. Við sprelluðum eitthvað með honum, fórum m.a. í Dover kastala auk þess að sýna honum nokkur þorp hér í kring. Hann lenti í því að missa af fluginu þegar hann átti að fara heim. Það hafði orðið 15 bíla árekstur á hraðbrautinni sem liggur upp að flugvellinum og því var alger umferðarstappa á leiðinni þangað. Svona getur víst gerst hérna og ekkert við því að gera. Hann komst nú síðan heim daginn eftir blessaður. Vonandi fælir þetta hann ekki frá því að koma aftur til okkar í sumar ;) Krökkunum fannst alveg frábært að fá uppáhalds frænda sinn í heimsókn enda var hann líka duglegur að dekra við þá.

Nú fer hver að verða síðastur að bóka helgi hjá okkur því að tíminn líður og áður en við vitum af verðum við komin aftur heim í kreppuna á klakanum. Nú fer að vora og hlýna og besti tíminn framundan hérna.

Á síðustu helgi fórum við inn í London. Þá var

fermingarfræðslutími hjá Valgeiri og

presturinn var búinn að bjóða foreldrum að taka þátt í tímanum

með krökkunum. Við skelltum okkur á það og vorum við í góðum fíling með Sigga presti, Fiffa og fermingarkrökkunum. Á eftir var messa í sænsku kirkjunni og síðan tónleikar með KK og Ellen

þar á eftir. Svaka fínn konsert. Góður dagur í London og öll orðin frekar þreytt þegar við komum heim.

Við skellum hérna inn slatta af myndum og þið munið að með því að smella á þær er hægt að fá þær stærri.

Þakkir

2008-03-05T09:24:00.001Z

Kæru ættingjar og vinir.
Ég þakka ykkur kærlega fyrir afmælisóskir og hjá sumum gjafir:) Hefði viljað hafa ykkur öll hjá mér á afmælisdeginum, en ég bý í Englandi en þið á Íslandi. Skemmti mér samt svaka vel í Tívolíinu og svo heppnaðist sjálfur afmælisdagurinn minn líka bara mjög vel.
Bið að heilsa öllum.
Kveðja,
Hrafnkell Hugi

Hann á afmæli í dag !!!

2008-03-03T10:27:00.005Z

Hann Hrafnkell Hugi, litli strákurinn okkar á 12 ára afmæli í dag.

Það er alveg ótrúlegt að hann sé orðinn 12 ára og að það séu 12 ár síðan hann kom í heiminn. Frá því að hann fæddist hefur hann alltaf séð til þess að mamma og pabbi hefðu nóg að gera og engin lognmolla hefur verið í kringum hann, sem betur fer. Það byrjaði reyndar á því að hann lét bíða eftir sér í 12 daga og síðan þegar hann loksins ákvað að koma í heiminn valdi hann það kvöld sem pabbi hans var að spila á balli og eyðilagði þar með heilt gigg hjá honum. Hann var ný búinn að telja í á ballinu, þegar hann fékk símhringingu um það að barnið væri að koma og að afi og amma væru á leið yfir á Ísafjörð með mömmu. En hann má þó eiga það að hann var ekki lengi að koma sér í heiminn og var fæddur fyrir kl. tvö, heilbrigður og hraustur drengur og um leið og við fengum hann í hendurnar sáum við að þarna væri Hrafnkell kominn. Það nafn átti eitthvað svo vel við hann. Og þar sem hann var ekkert að slóra við það að koma í heiminn þegar hann loksins ákvað að koma, gat pabbinn fengið tækifæri til þess að mæta aftur á ballið og klára síðustu lögin á ballinu, geri aðrir betur.

En blíðari og yndislegri dreng er ekki hægt að óska sér þó svo að stundum hafi hann í gegnum tíðina minnt okkur á Emil í Kattholti. En hjartahlýr var Emil og vildi öllum vel og það sama á við um Hrafnkel Huga.

Þar sem afmælisdagurinn er á mánudegi ákváðum við að gera eitthvað skemmtilegt með honum og fjölskyldunni á sunnudeginum. Við ákváðum að koma honum á óvart og fara með hann í tívolígarðinn Thorpe Park sem er í útjaðri London. Honum var sagt að við værum að fara með Valgeir í fermingarfræðslu í London. Það er vægt til orða tekið að minn maður var nú aldeilis ekki hrifinn af því, þar sem honum fannst nú að við ættum frekar að gera eitthvað skemmtilegt með honum, þar sem það væri næstum því afmælisdagurinn hans í dag. Já, við fórum svolítið illa með hann, en hann var svaka glaður þegar hann sá tívolígarðinn og alla rússíbanana.

Hann og Valgeir æddu síðan um allan garðinn og fóru í öll tæki sem hægt var að fara í, m.a. þrjá geðveikt stóra rússibana (með allskonar snúningum og hringjum), sleggjuna (the slammer) og fleiri geðveik tæki.

Á videóinu sést rússibaninn, sem strákarnir reyndu að draga foreldra sína í, en það var auðvitað bara mamman sem hafði kjarkinn til þess að prófa hann.

Katla Vigdís og Bryndís prófuðu aðeins rólegri tæki, en Katla kvartaði mjög á leiðinni heim að það hefði ekki verið nógu “skerí” tæki sem hún fékk að fara í og var frekar fúl yfir þessum hæðatakmörkunum sem eru á tækjunum. Hún hefði sko alveg þorað í öll tækin.

Þetta var alveg frábær dagur, engar biðraðir í tækin og það þurfti ekki að borga sér í hvert tæki, þannig að strákarnir nýttu sér það óspart.

En í dag ætla strákarnir að fara í bíó eftir skólann og eftir það verður pizzu og SS- pylsuveisla (enn eftir tveir pakkar af sendingunni góðu).

Til hamingu með afmælið elsku molinn okkar

Endilega óskið Hrafnkatli Huga til hamingju með afmælið hér á síðunni.

Dullarfulli Pakkinn

2008-02-12T22:47:00.000Z

Jæja komið þið sæl og blessuð, gamli maðurinn hann pabbi er alveg hættur að blogga, situr bara í tölvunni að skoða blogg hjá öðrum, þá þarf ég Hrafnkell Hugi að blogga sjálfur og halda áfram með þennan nýja fjölskyldu sið en nóg um það. Jæja, okkur barst dularfullt bréf um daginn sem sagði að við ættum að sækja pakka á pósthúsið, mamma fór að sækja hann og var mjög dularfull um pakkann þegar við komum heim úr skólanum. EN hún mamma kann ekki að halda leyndarmáli sérstaklega þegar ég beiti þrýstingi á hana og það sem leyndist í pakkanum vorum dásamlega góðar bollur frá ömmu og guðdómlegur harðfiskur frá afa svo voru líka pylsur og við pulsuðum okkur öll upp. Og átum yfir okkur þann daginn. Umh, uhm, nammi, nammi, namm.

AMMA OG AFI á Suðureyri, þið eruð alveg frábær, og komuð okkur sannarlega á óvart.

P.S.

Reyndar var ég nú búinn að segja Þóru ömmu það að það væri alveg dásamlegt að fá sendar til sín rjómabollur út á Bolludaginn og ekki væri verra að láta nokkra pylsupakka fylgja með en það kemur ekkert málinu við og ég þóttist ekkert kannast við það þegar pakkinn kom.

Kv. H. Hjúki

FRÉTTIR og MYNDIR

2008-01-31T13:00:00.000Z

Það er orðið svo langt síðan að eitthvað hefur nýtt birst hérna að nú verður aldeilis að taka á því. Þau hérna niðurfrá eru meira að segja búin að koma með færslu. Ótrúlegt en satt. Meira að segja með skemmtilegum myndaþætti. Það er best að segja frá einhverju sem hefur drifið á dagana okkar hérna. Við getum byrjað á gömlum fréttum og sagt frá tónleikarápi okkar. Við Valgeir skelltum okkur nú fyrir áramótin á tónleika með Sex Pistols inni í London. Þeir voru haldnir í Brixton Academy sem er í þægilegri akstursfjarlægð frá okkur. Við erum rúman klukkutíma að krúsa þarna inneftir. Á undan spilaði eitthvað "new hype" band sem var alveg hundleiðinlegt. Gömlu kallarnir voru samt alveg skemmtilegir þegar þeir loksins byrjuðu. Sándið var alger hörmung og vorum við svolítið hissa á því. Fyndið að sjá þá spila, gítarleikarinn er orðinn spikfeitur og þurfti að teygja sig til að ná fram á gítarinn sem lá framan á bumbunni á honum. Þeir eru með gamla bassaleikarann sem þeir ráku til að koma dópistaruslinu honum Sid Vicious að, en sagan segir að hann (þessi gamli) hafi samið megnið af stöffinu þeirra. Það heyrðist nú eiginlega ekkert í honum en hann lúkkaði alveg sannfærandi. Við gömlu hjónin fórum síðan á annan konsert á sama stað kvöldið áður en við flugum upp til Íslands í jólafríið. Við fórum til að kíkja á The Pogues sem er búið að vera eitt af uppáhalds hjá mér síðan átjánhundruð og epli.. eða eitthvað. Söngvarinn þeirra Shane McGovan er fyllibytta og dópisti en alger snillingur. Hann náði að koma prógramminu sæmilega frá sér, en maður heyrði að S hljóðin hans eru farin því að það vantar í hann megnið af framtönnunum. Það var greinilegt að það er spenna í gangi á milli hans og eins annars í bandinu því sá var alltaf skjótandi á hann fyrir fylleríið og aumingjaskapinn. Hann mundi reyndar alveg textana, en það kom alveg fyrir að hann kynnti vitlaust lag og uppskar þá skæting frá félaganum fyrir vikið. Svo fór hann nokkrum sinnum af sviðinu og þá staulaðist hann eins og gamall maður kominn að fótum fram. En músíkin maður, þetta er svo flott stöff og þvílíkir "Vírútósar" eins og Bubbi myndi segja, sem eru í þessu bandi. Þeir skiluðu því mjög flott og sándið var meira að segja bara alveg sæmilegt. Hápunkturinn var síðan þegar þeir tóku lagið Fairytale of New York. Til aðstoðar var dóttir eins úr bandinu til að syngja partana hennar Kirsty McColl, sem varð óvart fyrir því óláni að fá hraðbát í hausinn og deyja af þeim sökum fyrir nokkrum árum. Við vorum komin aftur heim upp úr miðnætti og svo þurftum við að vakna snemma um morguninn eftir til að keyra upp á Stansted flugvöll til að fljúga heim. Þetta gekk nú allt mjög vel fyrir sig.

Eftir að við komum út aftur eftir áramótin höfum við aðeins hreyft okkur. Við fórum til Folkestone um daginn, en það er bær sem er hérna niður við ströndina vestan við Dover. Þar er skemmtileg strönd og risastór krakkakastali til að leika sér í. Ætluðum varla að ná krökkunum út fyrir myrkur. Helgina eftir fórum við þangað aftur og þá með Ingibjörgu, Bjarka og Bryndísi með okkur.

Síðan fórum við inn í London á sunnudaginn því Valgeir átti fermingarfræðslutíma. Við hin dúlluðum okkur í Hyde Park á meðan. Á myndinni má sjá Kötlu cosmopolitan á línuskautunum sínum í Hyde Park (og vel á minnst, það er hægt að stækka myndirnar með því að smella á þær). Síðan var messa hjá íslenska söfnuðinum í sænsku kirkjunni í Englandi á eftir. Við höfum ekki verið mikið að hitta fólk sem við þekkjum á förnum vegi hérna af eðlilegum ástæðum, en í þessari messu hittum við hann Fiffa frá Ísafirði. Eins og allt alvöru fólk veit er hann sonur Evu danskennara og Steina kokks. Hann er að læra ljósahönnun hér í Englandi og tók að sér að vera með barnastarfið hjá íslenska söfnuðinum meðfram því. Duglegur strákur hann Fiffi.

Valgeir er aldeilis lukkulegur þessa dagana, hann fékk svo flotta jólagjöf að það slefa bara allir í kring um hann. Það var látið eftir honum að fá trommusett inn á heimilið. Þar með var friðurinn úti. Nágrannarnir alveg brjálaðir því trommuslátturinn glymur um allt hverfið og truflar alla þar. Nei djók. Við höfðum vit á því að kaupa rafmagnssett sem hægt er að hlusta á í heddfón. Hins vegar heyrist svolítið í bassatrommufetlinum þegar hann er að tromma. Hann er í trommutímum í skólanum og er búinn að vera síðan snemma í haust. Hefur bara æft sig með því að tromma á koddann sinn og jú líka eiginlega allt sem á vegi hans verður, þannig að þetta er ágæt lausn. Hrafnkell hefur fundið sér viðfangsefni í tölvuleiknum World of Warcraft sem hann fékk í jólagjöf frá bróður sínum. Það er svo mikið að gera hjá honum í leiknum að hann hefur ekki tíma fyrir blogg, sem er alger synd því það byrjaði svo vel hjá honum.

Heimsóknir

Nú og svo erum við að fá heimsókn núna á mánudaginn en þá eru Lilja systir Svövu og Hilmar kallinn hennar að koma til okkar. Systkini Svövu hafa aðeins verið að koma við hjá okkur, Fríða er búin að koma einu sinni og Didda og Gummi líka og svo Valur og Ása. Mér finnst það ekki neitt svo mikið, systir mín heimsækir okkur t.d. oft í viku. Svo komu Dóri og Dagný við hjá okkur og fengu að gista á leið sinni frá Skotlandi til Þýskalands. Þau áttu bíl uppi í Skotlandi og ákváðu að sækja hann og koma honum til manna. Fóru á sýningu í Þýskalandi og keyrðu bílinn síðan áfram til Svíþjóðar, sem Dóri segir að sé æðislegasta land í heimi. Hmm?

Nú og svo erum við að skoða það núna að fara til Sviss í skíðaferð í vor. Krakkarnir eiga löng skólafrí og við ætlum að nota páskafríið til þess að krúsa þarna niður eftir. Ingibjörg og fjölskylda kemur með og ætlum við að leigja okkur fjallakofa og hafa það kósí í heila viku þarna niðurfrá. Við erum svooo farin að hlakka til.

Góðar stundir.

Úti á ný

2008-01-09T20:21:00.000Z

Jæja, þá erum við lox á áfangastað. Komin aftur út í ferkantaraborg í gráma hversdagsins. Við tekur skóli og vinna. Jólafríið var alveg geeðveikt og við átum alveg ógeðslega mikið af svakalega óhollum mat og nammi. Verðum örugglega góðan tíma að koma meltingunni í samt lag á ný. Hér er núna um 10 stiga hiti og svona ágætis veður. Þætti allavega fínt heima á þessum árstíma nema fyrir það að það væri þá enginn snjór til að renna sér á. Talandi um snjó þá ætlum við að reyna að komast yfir á meginlandið í skíðaferð í næsta skólafríi. Erum að spotta út sniðugan stað til að fara á en það er víst nóg úrval.
Þau hérna neðar í götunni eru alveg upp fyrir haus í lærdómi og blogga því ekki neitt. Þau gera það nú hvort eð er ekki samt, en biðja bara kærlega að heilsa öllum sem vilja þekkja þau. Það eru próf og verkefnaskil hjá þeim núna eftir helgi svo að við læðumst bara á tánum.
Gaman að segja frá því að við fylgjumst voða lítið með lókal fréttum hérna. Það er oftast þannig þegar maður rambar á fréttatíma í útvarpinu að það er verið að segja frá ránum og morðum og umferðarhnútum. Af öllu því virðist vera nóg. Þess utan þá eru helstu fréttir úr ferkantaraborg að það á að fara að gera upp leikhúsið hérna fyrir svaka mikinn pening, og Hollywoodleikarinn Orlando Bloom sem er fæddur og uppalinn hér í bæ, ætlar að borga stóran part af kostnaðinum. Leikhúsið er orðið gamalt og lúið en mikið notað og tókum við eftir því nú í haust að það var show þar í gangi þar sem í aðalhlutverki var hin eina sanna Linda Gray sem allir muna eftir úr Dallasþáttunum hér í den. Já börnin góð, heimurinn er lítill.
Góðar stundir.

Jólakveðja

2007-12-26T14:13:00.000Z

Gleðileg Jól öllsömul.
Við höfum það bara alveg frábært í heimahögunum svo ekki sé meira sagt. Við dveljum á Suðureyri og höfum flakkað á milli jólaboða bæði þar og í Hnífsdal. Við gömlu fórum í messu á sjúkrahúsinu á Ísafirði í gær (jóladag) með Svövu langömmu sem þar dvelur. Það var ósköp notalegt. Framundan eru svo fleiri jólaboð og svo náttúrulega áramótagleðin. Vonum að allir hafi það sem best yfir hátíðarnar.

Hrafnkell Hugi Bloggar

2007-12-17T20:27:00.000Z

Við viljum vekja athygli á því að Hrafnkell Hugi er farinn að blogga á eigin síðu. Það er tengill hér til vinstri yfir á bloggið hans og einnig má smella hér. Hrafnkell fer um víðan völl í yfirferð sinni um snertifleti samfélags, sögu og menningar. Einnig kemur hann inn á pólitík þar sem hagur innflytjenda og skólamál eru honum einkar hugleikin. Samfélagsgagnrýni lætur hann ekki undir höfuð leggjast að ástunda svo eftir er tekið. Við hvetjum alla til að líta við á síðunni hans og taka jafnvel þátt í umræðunni með því að kommenta í athugasemdakerfið.

Jólasveinar ganga um gólf

2007-12-16T23:51:00.000Z

Jólaundirbúningurinn hefur gengið vel hjá okkur. Þetta er ekkert smá næs að þurfa ekki að snúa öllu á hvolf til að þrífa í þetta skiptið. Við höfum í rólegheitum verslað jólagjafirnar og nokkuð liðið síðan við lukum þeim innkaupum. Við höfum því haft rúman tíma til að gera fínt í kring um okkur og þar sem að seríur og skraut kostar nú sama og ekkert hérna ákváðum við að kýla á að skreyta nú kofann okkar almennilega og sýna tjöllunum hvernig á að skreyta að hætti alvöru fólks. Þið getið skoðað árangurinn með því að smella á myndina. Aumingja tjallarnir að við skulum ekki vera hérna um áramótin, því þá gætu þeir sko fengið að upplifa alvöru flugeldasýningu.

Valgeir skammast sín

2007-12-13T16:27:00.000Z

Við fórum á opinn dag í skólanum hjá strákunum um daginn. Þar var líf og fjör og þemað var James Bond. Teikningar og myndir af honum upp um alla veggi. Það voru sölubásar út um allt þar sem var verið að selja ýmis konar varning og einnig var ýmislegt til afþreyingar. M.a. var rafmagnsbílabraut þar sem hægt var að reyna sig í kappi við tímann. Skemmst frá að segja að gamli maðurinn stóð uppi sem sigurvegari eftir harða keppni. Valgeir sagði að það væri bara sorglegt að 36 ára gamall maður væri að sýna yfirburði sína yfir 5 ára krökkum. Skammast sín bara fyrir aldraðan föður sinn.
Þannig er nú það.

Jóla hvað

2007-12-09T23:19:00.000Z

Þarna göbbuðum við ykkur svakalega. Komum aftur að vörmu, haha, engin nenna til að blogga neitt. Nema hvað. Nú er orðið jólalegt í Kantaraborg, seríur og ljósahreindýr eru farin að birtast víða. Það er þó enginn sem toppar okkur íslendinga, þegar kemur að ljósaskreytingum, við eigum örugglega met í því eins og í svo mörgu öðru. Það er ekki laust við að maður sakni þess núna. Miðað við Ísland er þetta nú heldur klént hjá Englendingum, og smekkvísin er ekki alltaf mikil. En að sjálfsögðu er mjög notalegt að hafa jólaljósin og minnir það okkur á hvað það er orðið stutt þar til að við förum heim. Það eru allir farnir að telja niður.

Þó svo að okkur finnist ekkert endilega vera skreytt mikið utandyra hjá fólki, þá er fólk búið að skreyta allt inni hjá sér. Katla fór í heimsókn til vinkonu sinnar í dag, og hún var alveg í sjokki þegar við sóttum hana, "mamma það eru bara komin jólin hjá Jade, jólatréð er komið upp og það eru meira að segja jólapakkar undir trénu". Ja hérna, það er ótrúlegt hvað fólki liggur á, það hlýtur að þurfa að hrista rykið af trénu þegar jólin loksins koma, eða þá eru kannski allir búnir að fá nóg af þessu tré, og búnir að henda því út, hver veit? Reyndar er sagt að allir hangi síðan á pöbbnum yfir jólin, en veit nú ekki hvort að ég eigi að trúa því, en það er þó alveg víst að Englendingar umgangast áfengi öðruvísi en við. Um daginn var jólabasar og hlutavelta í skólanum hjá Kötlu, og meðal vinninga vöru áfengisflöskur. Þætti nú ekki við hæfi heima, væri skemmtilegt ef eitthvað barnið ynni nú flöskuna, spurning hvort að það fengi þá ekki líka að drekka úr henni. Þetta minnir mig nú reyndar á það þegar Valur bróðir vann sígarettukarton, þá 11 - 12 ára gamall á fjölskylduskemmtun hjá Sumargleðinni í den. Lengi vel hafði hann pakkann uppstilltan í herberginu sínu, þetta var jú hans vinningur, þannig að það kom ekki til greina að taka hann af honum. Ég veit nú ekki lengur hvað varð um kartonið, en allavega varð það ekki til þess að Valur byrjaði að reykja, nema þá að hann hafi reykt kartonið og fengið nikótínspítt fyrir lífstíð?

Strákarnir höfðu sömu sögu að segja úr sínum skóla, en þar voru krakkarnir hvattir til að koma með áfengi í skólann, til að hafa á jólabasarnum. Valgeir sagði að það hefði verið frekar skondið þegar krakkarnir voru að draga flöskurnar upp úr skólatöskunum, og við erum ekki bara að tala um létt vín, Valgeir sagði að einn hefði komið með rísa stóra flösku af Smirnoff, (veit reyndar ekki hvernig hann þekkir það humm). Það er þó aldrei að vita nema við smyglum inn íslensku kláravíni, þegar við komum aftur, og sendum strákana með það í skólann. Annars vill Hrafnkell alls ekki taka þátt í þessu, hann segir að þessi skóli sé alltaf að betla peninga.

Katla er farin að spá í því hvort að íslenski jólasveinninn komi hingað, og þá hvernig hann komist, ég hef nú ekki trú á öðru en að hann geri það, enda er Katla svo stillt og góð stúlka og Bryndís frænka hennar er nú líka hérna í sömu götu, þannig að hann hlýtur að gera sér ferð hingað. Ég mun allavega hvetja hana til þess að setja skóinn út í glugga þann 11. des.

Reyndar eru Katla og Bryndís nú þegar búnar að hitta íslenskan jólasvein á jólaballi sem þær fóru á í London, en íslendingafélagið sá um ballið, þannig að það var ekkert mál að redda íslenskum jólasveini á staðinn. Katla Vigdís skemmti sér svaka vel á jólaballinu og söng hástöfum og tók þátt í öllu sem fram fór.

Fólk verður alveg undrandi þegar við segjum því að á Íslandi séu 13 jólasveinar og að börnin setji skóinn út í glugga 13 dögum fyrir jól og fá í hvert sinn einhvern glaðning, ef þau hafi verið góð. Hér er það þannig að jólasveinninn heitir father christmas, og það er hann sem gefur börnunum stærstu jólagjöfina á jóladag. Englendingar trúa því líka að jólasveinninn eigi heima í Finnlandi (meiri fávísin það), og það er draumur allra foreldra að geta farið með börnin í jólaferð til Finnlands og hitt jólasveininn, og ef þau eru heppin sjá þau norðurljósin í leiðinni.

Það verður að segjast að þarna voru Finnar sniðugir. Í raun er það alveg furðulegt að enginn hafi spáð í að markaðssetja jólaferðir til Íslands, búa til einhvern skemmtilegan pakka í kringum þetta. Ég er viss um að það væri hægt að hagnast vel á þessu því að foreldrar virðast vera tilbúnir að borga töluvert fyrir þetta. Það verður kannski hægt að gera þetta fyrir vestan, ef farið verður að fljúga beint til Ísafjarðar. Vá, maður er bara kominn með svaka viðskiptahugmynd, dríf mig í að fá einkaleyfi á hana :)

Í dag var okkur boðið í jóla- partý, hjá vinkonu Kötlu, það var bara mjög gaman, boðið var upp á pinnamat, jólaglögg og enska jólaköku, sem var greinilega búin að liggja vel í því. Amman á heimilinu spilaði á píanó og söng með krökkunum. Þetta var bara mög skemmtilegt og kom manni í jólaskapið. Í kvöld kveiktum við síðan á öðru kertinu á aðventukransinum og sungum jólalög og áttum notalega stund saman. Eigum bara eftir að gera það einn sunnudag í viðbót, og síðan komum við heim þann 19. des. Vona bara að við fáum hvít jól, er að verða ansi þreytt á rigningunni sem er búin að vera hér.

Kveðja frá öllum.

Ný Slóð

2007-11-23T23:06:00.000Z

Húbbalabbalei. Við erum komin á aðra slóð. Bara vesen á þessu bloggar-kerfi.
Erum að stilla þessu upp núna, komum svo að vörmu með sjóðandi heitar fréttir úr ferkantaraborg.
Þangað til - Góðar stundir.